यस दिन नेप्से परिसूचक ३५.०९ अंक घटेर २७२५.७१ विन्दुमा झरेको छ भने ८ अर्ब १७ करोड २१ लाख ४३ हजार रुपैयाँ बराबरको शेयर खरिदबिक्री भएको छ । पछिल्लो पटक बजारमा बैंक तथा वित्तीय संस्थामा लगानीकर्ताको आकर्षण बढेको थियो । आजको बजारमा यिनै समूहमा सर्वाधिक नाफा सुरक्षित भएको छ ।
नेपाल राष्ट्र बैंकको मौद्रिक नीतिले बैंकहरुको व्यवसाय वृद्धि गर्ने नीति लिने अपेक्षा सहित बढेको थियाे । समग्रमा लचक मौद्रिक नीति आएको छ । निरन्तर बढेको बजारमा राम्रोसँग बढेका कम्पनीमा नाफा सुरक्षित हुँदा बजारमा दवाव परेको लगानीकर्ताको बुझाई रहेको छ ।
अर्को तर्फ असार मसान्तको दवाव बजारमा परेको छ । यो अवस्थामा लगानीकर्ताहरु ब्रोकरको लिमिटबाट कारोबार गर्न पाएका हुँदैनन । उधारोबार किनिएको शेयर पनि ब्रोकरले सेटलमेन्ट गर्नैपर्ने बाध्यता भएकाले बजारमा दवाव परेको हुनसक्ने अनुमान गरिएको छ । सोमबारको घटाइलाई लगानीकर्ताहरु सामान्य रुपमा लिएका छन् । नयाँ आर्थिक वर्ष सुरु भएपछि बजारले पुनः सकारात्मक गति लिनेमा लगानीकर्ताहरु आशावादी भएका हुन । साउन लागेसँगै मौद्रिक नीति कार्यान्वयन हुने र त्यसको सकारात्मक प्रभाव बजारमा देखिन थाल्ने लगानीकर्ताहरुको बुझाई छ ।
