बोर्डले जारी गरेको सूचनाअनुसार जेठ १६ गतेदेखि अर्को निर्णय नभएसम्म निजी स्वास्थ्य संस्थाबाट दिइँदै आएका बीमासम्बन्धी नियमित सेवा बन्द हुनेछन्।
यस निर्णयसँगै अब स्वास्थ्य बीमा गरेका नागरिकले निजी अस्पतालमा ओपीडी सेवा, स्वास्थ्य परीक्षण, शल्यक्रिया, औषधि तथा नियमित उपचार सहज रूपमा पाउने छैनन्। आकस्मिक सेवा भने यथावत रहने बताइएको छ। देशभर स्वास्थ्य बीमा कार्यक्रममा आबद्ध ३६ वटा निजी अस्पताल तथा मेडिकल कलेज प्रत्यक्ष प्रभावित हुने भएका छन्।
सरकारले “सबै नागरिकलाई स्वास्थ्य सेवामा पहुँच” भन्ने उद्देश्यसहित सुरु गरेको स्वास्थ्य बीमा कार्यक्रम अहिले भने आर्थिक संकट, प्रशासनिक कमजोरी र बक्यौता भुक्तानीका कारण धराशायी हुने अवस्थामा पुगेको भन्दै आलोचना बढेको छ। स्रोतकाअनुसार सरकारले वर्षौंदेखि निजी अस्पताललाई दिनुपर्ने अर्बौं रुपैयाँ भुक्तानी गर्न नसक्दा निजी क्षेत्र निरन्तर दबाबमा थियो। अन्ततः स्वास्थ्य बीमा बोर्ड सेवा कटौती गर्ने निर्णयमा पुगेको हो ।
