सम्झौता अनुसार, निजी इक्विटी फर्म 'लङरेन्ज क्यापिटल' ले चीनको मुख्य भूमि बाहेकको विश्वव्यापी ब्रान्ड र सञ्चालनलाई १.५ अर्ब डलरमा अधिग्रहण गर्नेछ। त्यसैगरी, 'यम चाइना होल्डिंग्स' ले चीनको मुख्य भूमि भित्रको पिज्जा हट सञ्चालनलाई १.२ अर्ब डलरमा खरिद गर्नेछ।
"लङरेन्ज र यम चाइनाको स्वामित्वमा पिज्जा हटले भविष्यमा थप प्रगति गर्ने विश्वास लिएका छौँ, किनकि यिनीहरूसँग रेस्टुरेन्ट उद्योगको निकै गहिरो अनुभव र विशेषज्ञता छ," यम! ब्रान्ड्सका मुख्य कार्यकारी क्रिस टर्नरले भने।
अमेरिकामा 'क्याजुअल डाइनिङ' (बसेर आरामसँग खान मिल्ने रेस्टुरेन्ट) को पर्यायवाची मानिने पिज्जा हट लामो समयदेखि व्यावसायिक कठिनाइबाट गुज्रिरहेको थियो। त्यही सङ्कटका बीच कम्पनीले बिक्रीको यो निर्णय लिएको हो।
अमेरिकी बजारमा लगातार धेरै त्रैमासिकसम्म यसका स्टोरहरूको बिक्रीमा गिरावट आएपछि यम! ब्रान्ड्सले पहिलो पटक नोभेम्बर २०२५ मा पिज्जा हट बिक्रीको विकल्प खोजिरहेको खुलासा गरेको थियो। पिज्जा हट चेनका लागि अमेरिकी बजार अत्यन्तै महत्त्वपूर्ण मानिन्छ,किनकि यसले यसको कुल अन्तर्राष्ट्रिय बिक्रीको झन्डै ४० प्रतिशत हिस्सा ओगट्छ।
विशेष गरी डोमिनोज,पापा जोन्स र लिटिल सिजर्स जस्ता बजारमा बलियो रूपमा फर्किएका अन्य पिज्जा चेनहरूसँगको तीव्र प्रतिस्पर्धाका कारण पिज्जा हटको व्यावसायिक प्रदर्शन खस्किएको हो। महँगी बढेको वर्तमान समयमा यी प्रतिस्पर्धी कम्पनीहरूले मूल्यप्रति संवेदनशील ग्राहकहरूलाई आकर्षित गर्न आक्रामक रूपमा छुटका आकर्षक प्याकेजहरू ल्याइरहेका छन्।
यसबाहेक,मध्यम आकारका क्षेत्रीय चेनहरूले पनि बजारमा आफ्नो बलियो प्रभाव पारेका छन्। तथाकथित 'पिज्जा युद्ध' मा यी साना र बढी सक्रिय फास्ट-फूड प्रतिस्पर्धीहरूले उपभोक्ताहरूको बदलिँदो बानी र चाहना अनुसार आफूलाई द्रुत रूपमा ढालेका छन्। त्यस्तै, तेस्रो-पक्ष (थर्ड पार्टी) डेलिभरी एपहरूको तीव्र वृद्धिले उपभोक्तालाई खानेकुराका थुप्रै विकल्पहरू उपलब्ध गराइदिएका छन्, जसले पिज्जा हटको ऐतिहासिक प्रभुत्वलाई थप कमजोर बनाइदिएको छ।
सन् १९५८ मा अमेरिकाको क्यान्सासस्थित विचिटामा दुई दाजुभाइले पिज्जा हटको सुरुवात गरेका थिए। पछि सन् १९७७ मा यसलाई पेप्सिको (PepsiCo) ले खरिद गर्यो र सन् १९९७ मा यो 'यम! ब्रान्ड्स' अन्तर्गत छुट्टै कम्पनीको रूपमा आयो।
"पिज्जा हट विश्वकै सबैभन्दा स्थापित रेस्टुरेन्ट ब्रान्डहरूमध्ये एक हो र यम! को इतिहासमा यसले खेलेको महत्त्वपूर्ण भूमिकाप्रति हामीलाई गर्व छ," टर्नरले थपे।
यसअघि,डाइन-इन रेस्टुरेन्ट सञ्चालन गर्ने कम्पनी 'डीसी लन्डन पाई' वित्तीय सङ्कटमा परेर प्रशासनिक नियन्त्रणमा गएपछि यम! ले गत वर्ष अक्टोबरमा पिज्जा हटको बेलायत (युके) सञ्चालन आफैँले खरिद गरेको थियो। उक्त आर्थिक सङ्कटका कारण सुरुमा बेलायतमा ६८ वटा रेस्टुरेन्ट बन्द हुनुका साथै १,२०० भन्दा बढी रोजगारी जोखिममा परेका थिए। तर, पछि उद्धार सम्झौतामार्फत करिब ६४ वटा रेस्टुरेन्टलाई जोगाइएको थियो।
घाटामा गइरहेको यस डिभिजनलाई बिक्री गरेर यम! ब्रान्ड्सले आफ्नो ध्यान र स्रोतहरू केएफसी (KFC) र टाको बेल (Taco Bell) जस्ता आफ्ना अन्य मुख्य र नाफामूलक ब्रान्डहरूमा केन्द्रित गर्ने लक्ष्य राखेको छ।
लङरेन्ज क्यापिटल र यम चाइनासँगको यो व्यावसायिक सम्झौता आवश्यक नियामकहरूको स्वीकृतिपश्चात् सन् २०२६ को तेस्रो त्रैमासिकसम्ममा पूर्ण रूपमा टुङ्गिने अपेक्षा गरिएको छ।
