आशुतोष इनर्जीले मंसिर १४ गतेदेखि आईपीओ निष्काशन गर्ने

Nov 19, 2026 10:58 AM Merolagani



आशुतोष इनर्जी लिमिटेडले मंसिर १४ गतेदेखि आईपीओ निष्काशन गर्ने भएको छ। कम्पनीले आयोजना प्रभावित क्षेत्रका स्थानिय बासिन्दा तथा वैदेशिक रोजगारीमा रहेका नेपालीहरुका लागि आईपीओ निष्काशन गर्न लागेको हो।

कम्पनीले जारी पूँजी ६० करोड रुपैयाँको २० प्रतिशत अर्थात १२ करोड रुपैयाँबराबरको १२ लाख कित्ता शेयर निष्काशन गर्ने अनुमति पाएको थियो। सोमध्ये ६ करोडरुपैयाँबराबरको प्रतिकित्ता १०० रुपैयाँ अंकित मूल्यका ६ लाख कित्ता शेयर आयोजना प्रभावित क्षेत्रका स्थानिय बासिन्दाहरुका लागि निष्काशन गर्न लागेको हो। स्थानिय बासिन्दाहरुका लागि निष्काशन गरिने शेयरमध्ये ३ लाख कित्ता शेयर अति प्रभावित क्षेत्र लमजुङ जिल्लाको हाल दुधपोखरी गाउँपालिका वडा नं. १ र २ तथा गारखा जिल्लाको हाल अजरिकोट गाउँपालिका वडा नं. २ र ३ का स्थानिय बासिन्दाहरुमा बाँडफाँट गरिनेछ भने बाँकी ३ लाख कित्ता शेयर अतिप्रभावित क्षेत्र बाहेकको दुधपोखरी गाउँलिका एवं दोर्दी गाउँपालिका तथा अजरिकोट गाउँपालिकाका स्थायी बासिन्दाहरुमा बाँडफाँट गरिनेछ।

यसका साथै कम्पनीले सर्वसाधारणमा निष्काशन गरिने शेयरको १० प्रतिशत अर्थात ६० हजार कित्ता साधारण शेयर नेपाल सरकारको सम्बन्धित निकायबाट श्रम स्वीकृती प्राप्त गरी विदेशमा रोजगार गरी रहेका नेपालीहरुका लागि निष्काशन गर्न लागेको हो।

सो आईपीओमा न्यूनतम १० कित्ताका लागि आवेदन दिनुपर्नेछ भने अधिकतममा २० हजार कित्ताका लागि आवेदन दिन सक्नेछन्।

आयोजना प्रभावित क्षेत्रका स्थानिय बासिन्दाहरुका लागि निष्काशन बन्द छिटोमा मंसिर २८ गते हुनेछ भने ढिलोमा पुस १४ गते हुनेछ। वैदेशिक रोजगारीमा रहेका नेपालीहरुले भने मंसिर १७ गतेभित्र आवेदन दिनु पर्नेछ। सो अवधिभित्र पर्याप्त आवेदन नपरेमा निष्काशन अवधि मंसिर २८ गतेसम्म लम्बिनेछ।

आईपीओ निष्काशनको लागि गराएको रेटिङ्गमा इक्रा नेपालले कम्पनीलाई इक्राएनपी इस्यूअर रेटिङ्ग ट्रीपल बी माइनस प्रदान गरेको छ। यसले कम्पनीको दायित्व बहन गर्ने क्षमतामा औषत जोखिम रहेको संकेत गर्दछ।

कम्पनीले प्रबर्धन गरेको ८.३ मेगावाट क्षमताको चेपे खोला साना जलविद्युत आयोजनाको कुल लागत १ अर्ब ४५ करोड ९ लाख ५९ हजार १५६ रुपैयाँ रहेको छ भने प्रतिमेगावाट लागत १६ करोड ८१ लाख २९ हजार ६८२ रुपैयाँ रहेको छ। सो आयोजनाले २०७६ मंसिर १६ विद्युत अनुमति प्राप्त गरेको थियो। यस अनुसार कम्पनीको विद्युत उत्पादन अनुमति २८.२२ वर्ष बाँकी छ। उक्त आयोजनाको साधारण लगानी फिर्ता हुने अवधि ४.६६ वर्ष रहेको छ भने डिस्काउण्टमा लगानी फिर्ता हुने अवधि ५.८६ वर्ष रहेको छ। उक्त आयोजनाले २०७९ असोज १६ गतेदेखि विद्युत उत्पादन गरिरहेको छ।

त्यस्तै, कम्पनीले नै प्रबर्धन गरेको हाल निर्माणधीन अवस्थामा रहेको २ मेगावाट क्षमताको चेपे खोला क्यास्केड जलविद्युत आयोजनाको कुल लागत ४३ करोड ४० लाख रुपैयाँ रहेको छ। सो आयोजनाको प्रतिमेगावाट लागत २१ करोड ७० लाख रुपैयाँ रहेको छ। सो आयोजनाले २०८१ कात्तिक १४ गते विद्युत उत्पादन अनुमति प्राप्त गरेको थियो। यस अनुसार कम्पनीको विद्युत उत्पादन अनुमति ३३.१२ वर्ष बाँकी छ। उक्त आयोजनाको साधारण लगानी फिर्ता हुने अवधि ७.९० वर्ष रहेको छ भने डिस्काउण्टमा लगानी फिर्ता हुने अवधि १२.४७ वर्ष रहेको छ।

कम्पनीको शेयर निष्काशन तथा बिक्री प्रबन्धक एनएमबि क्यापिटल लिमिटेड रहेको छ। स्थानिय बासिन्दाले नेपाल धितोपत्र बोर्डबाट सि आस्बा दसइस प्राप्त गरेका सम्पूर्ण बैंक तथा वित्तीय संस्थाहरु र तिनका शाखा कार्यालय, आयोजना कार्यालय, ग्लोबल आइएमई बैंकको दोर्दी शाखा, हिमालयन बैंकको गौडा शाखा, राष्ट्रिय वाणिज्य बैंकको भच्चेक शाखा र एनएमबि बैंकको बेसीशहर शाखा कार्यालयबाट आवेदन दिन सक्नेछन्।

वैदेशिक रोजगारीमा रहेका नेपालीहरुले नेपाल धितोपत्र बोर्डबाट स्वीकृति प्राप्त गरेका सम्पूर्ण सि आस्बा सदस्य बैंक तथा वित्तीय संस्थाहरु र तिनका तोकिएका शाखा कार्यालयहरु तथा सिडिएस एण्ड क्लियरिङ्ग लिमिटेडले निर्माण गरेको सफ्टवेयर ‘मेरो शेयर’ अनलाइन प्रयोग गरी सि आस्बा प्रणाली मार्फत आवेदन दिन सक्नेछन्।




सुनचाँदीको मूल्यमा भारी गिरावट

Nov 18, 2026 10:46 AM

नेपाली बजारमा मंसिर २ गते, बुधबार पनि सुन र चाँदी दुवैको मूल्यमा भारी गिरावट आएको छ। नेपाल सुनचाँदी व्यवसायी महासंघका अनुसार आज एकैदिन सुनको मूल्य प्रतितोला ६ हजार ३०० रुपैयाँले घटेको हो।