बीमा प्राधिकरणको विवरणअनुसार १४ जीवन बीमा कम्पनीहरूले २०८१ पुसमसान्तसम्ममा ८० अर्ब ६६ करोड रुपैयाँ संकलन गरेको थियो भने २०८२ मा सो रकम बढेर ९४ अर्ब ३७ करोड ६३ लाख रुपैयाँ पुगेको छ। यसरी बीमा शुल्क संकलनमा १७ प्रतिशतले वृद्धि भएको छ, जुन जीवन बीमा व्यवसाय विस्तारको स्पष्ट संकेत हो।
नेपाल लाइफ इन्स्योरेन्स कम्पनीले २०८१ को पुसमा २२ अर्ब ४५ करोड रुपैयाँ संकलन गरेकोमा २०८२ को पुस मसान्तसम्म आइपुग्दा २५ अर्ब ५१ करोड रुपैयाँ पुर्याउँदै बजारमा अग्रता कायम राखेको छ। नेशनल लाइफले पनि ९ अर्ब ६० करोड रुपैयाँबाट बढेर ११ अर्ब ३७ करोड रुपैयाँ संकलन गरेको छ। लाइफ इन्स्योरेन्स कम्पनी (नेपाल) ले ९ अर्ब ४६ करोड रुपैयाँबाट बढेर १० अर्ब २२ करोड रुपैयाँ संकलन गर्दै ८।०९ प्रतिशतको वृद्धि देखिएको छ ।
सूर्य ज्योति लाइफ, आइएमई लाइफ, राष्ट्रिय जीवन बीमा कम्पनी, रिलायन्स लाइफ, सिटिजन लाइफ, प्रभु महालक्ष्मी लाइफ, मेट लाइफ, सानिमा रिलायन्स लाइफ, एसियन लाइफ लगायतका कम्पनीहरूले पनि अघिल्लो वर्षको तुलनामा बीमा शुल्क संकलनमा वृद्धि गरेका छन्। सन नेपाल लाइफ र हिमालयन लाइफ इन्स्योरेन्स कम्पनीको वृद्धि दर तुलनात्मक रूपमा कम भए पनि संकलन रकम अघिल्लो वर्षभन्दा माथि पुगेको छ। चालु आवको पुस मसान्तसम्म सबै कम्पनीहरूले सकारात्मक प्रगति हासिल गरेका छन्।
आर्थिक गतिविधि विस्तारसँगै ग्राहकहरूको बीमा प्रति रुचि बढेको छ। दोस्रो, कम्पनीहरूले ल्याएका नयाँ बीमा योजनाहरूले बजारमा आकर्षण बढाएको छ। तेस्रो, डिजिटल पहुँच र बजार प्रचारले बीमा व्यवसायलाई थप बल दिएको छ। साथै, बीमा शिक्षा र वित्तीय सचेतनामा भएको सुधारले पनि ग्राहकलाई बीमा योजनातर्फ आकर्षित गरेको बीमा कम्पनीहरुले बताएका छन् ।
यस वृद्धि दरले जीवन बीमा बजारको भविष्य उज्ज्वल देखाएको छ। कम्पनीहरूले अझै नवप्रवर्तन, ग्राहकमैत्री सेवा, र दीर्घकालीन योजनामा ध्यान दिनुपर्ने आवश्यकता छ। नियामक निकायले पनि पारदर्शिता, नवीकरण दर सुधार, र ग्राहक हितमा केन्द्रित पहलहरूलाई प्राथमिकता दिनुपर्ने देखिन्छ।
२०८२ मा जीवन बीमा बजारले अघिल्लो वर्षको तुलनामा उल्लेखनीय वृद्धि हासिल गरेको छ। यसले बीमा क्षेत्रको दीर्घकालीन स्थायित्वमा विश्वास जगाएको छ र कम्पनीहरूलाई अझै प्रतिस्पर्धी, नवप्रवर्तनशील, र ग्राहक केन्द्रित बन्न प्रेरित गरेको छ।
