निष्कासन तथा बिक्री प्रबन्धक ग्लोबल आइएमई क्यापिटल लिमिटेडले जानकारी गराए अनुसार, सर्वसाधारणमा शेयर निष्कासन गर्दा कम्तीमा चार (४) कार्य दिन निष्कासन खुल्ला गर्नुपर्ने व्यवस्था रहेकोले भोलि अन्तिम दिनसम्म मेरो शेयर मार्फत आवेदन दिन सकिनेछ।
कम्पनीको आईपीओमा तेस्रो दिनसम्ममै मागभन्दा अत्यधिक बढी आवेदन परेको छ। आज फागुन २५ गते, आइतबार, बिहान १० बजेसम्मको तथ्याङ्क अनुसार, २२ लाख ७७ हजार ९९३ जना आवेदकले २ करोड ४८ लाख १५ हजार ४५० कित्ता शेयरका लागि आवेदन दिएका छन्। यो सङ्ख्या सर्वसाधारणका लागि छुट्टाइएको १८ लाख ४२ हजार ६ सय कित्ता शेयरभन्दा धेरै गुणा बढी हो।
शिखर पावर डेभलपमेन्ट लिमिटेडले जारी पूँजी ९८ करोडको ३२.६५ प्रतिशत अर्थात् ३२ करोड बराबरको प्रति शेयर १०० रुपैयाँ अंकित मूल्यका दरले ३२ लाख कित्ता साधारण शेयर निष्कासन गरेको थियो। यसमध्ये, आयोजना प्रभावित क्षेत्र बागलुङ जिल्लाका स्थानीय बासिन्दाहरूलाई ९ लाख ८० हजार कित्ता शेयर बाँडफाँट गरिसकेको छ।
स्थानीयलाई बाँडफाँट गरेपश्चात् बाँकी रहेको २२ लाख २० हजार कित्ता साधारण शेयरमध्ये विभिन्न समूहका लागि छुट्टाइएको थियो। यसअनुसार, १० प्रतिशत वैदेशिक रोजगारीमा रहेका नेपाली नागरिकहरूका लागि, ५ प्रतिशत सामूहिक लगानी कोषहरूका लागि र २ प्रतिशत कम्पनीका कर्मचारीहरूका लागि शेयर बाँडफाँट गरिएको थियो। यी समूहका लागि छुट्टाइएको शेयरपछि सर्वसाधारणका लागि १८ लाख ४२ हजार ६ सय कित्ता शेयर फागुन १७ गतेदेखि सार्वजनिक निष्कासन तथा बिक्री खुल्ला गरिएको थियो।
