यो संयुक्त उपक्रमले आगामी ५ वर्षका लागि १ अर्ब १० करोड ४० लाख ३७ हजार ८ सय रुपैयाँमा सञ्चालनको जिम्मा पाएको हो । उसले सर्भिस प्रोभाइडरको जिम्मा पाए पनि सम्झौता हुन भने बाँकी छ ।
सम्झौता हुन अझै १५ दिन लाग्ने नागढुंगा सुरुङमार्ग निर्माण आयोजनाले जनाएको छ । आयोजनाका सिनियर डिभिजनल इन्जिनियर सञ्जय पन्थीका अनुसार, सबैभन्दा कम रकम कबोल गरेको आधारमा चिनियाँ कम्पनी चोङ्गक्वीङ्ग युसिन रोड एण्ड ब्रिज डेभलपमेन्ट कम्पनी लिमिटेड र नेपाली कम्पनी एआरटी कन्स्ट्रक्सनको संयुक्त उपक्रम युसिन–एआरटी ज्वाइन्ट भेन्चर्सलाई छनोट गरिएको हो ।
आयोजनाले आज मात्रै उक्त कम्पनीलाई सञ्चालन तथा मर्मतसम्भारका लागि छनोट गरिएको आशय पत्र प्रकाशित गरेको छ । यो आशय पत्रको आधारमा कसैले चाहेमा दावी–विरोध गर्न ७ दिनको अवधि तोकिएको छ ।
