नवनिर्वाचित कार्यसमितिको सम्मानमा काठमाडौंमा आयोजित कार्यक्रमलाई सम्बोधन गर्दै अध्यक्ष डाँगीले ऊर्जा क्षेत्रको विकास, लगानीको सुरक्षा र नीतिगत सुनिश्चिततालाई मुख्य प्राथमिकतामा राख्ने घोषणा गरेका हुन्। अध्यक्ष डाँगीले यस कार्यकालका लागि ‘हाम्रो ऊर्जा, हाम्रो भविष्यः लगानीको सुरक्षा र नीतिगत सुनिश्चितता’ भन्ने मूल नारा तय गरिएको जानकारी दिए। उनले समृद्ध ऊर्जा क्षेत्रका लागि निर्णायक नेतृत्व प्रदान गर्ने प्रतिवद्धतासहित ‘इप्पान भिजन २०२९’ मा उल्लेखित कार्यक्रमहरूलाई अक्षरशः कार्यान्वयन गर्ने बताए ।
सामूहिक नेतृत्वको अवधारणालाई आत्मसात् गर्दै इप्पानले सातवटा विशेष समिति र आवश्यकताअनुसार उप–समितिहरू गठन गर्ने भएको छ । ती समितिहरूलाई कार्यसूचीसहित पूर्ण अधिकार प्रत्यायोजन गरी सक्रिय बनाइने डाँगीले उल्लेख गरे। निःवर्तमान अध्यक्षको संयोजकत्वमा बढीमा ११ सदस्यीय सल्लाहकार समिति र ऊर्जा क्षेत्रका विज्ञहरू सम्मिलित ७ देखि ९ सदस्यीय उच्च स्तरीय विज्ञ सल्लाहकार समिति गठन गरिने उनको भनाइ छ ।
सरकारका पूर्वसचिवको संयोजकत्वमा गठन हुने विज्ञ समितिले ‘रिसर्च एण्ड डेभलपमेन्ट’ (अनुसन्धान र विकास) मा काम गर्नेछ । यस समितिले विद्युत विधेयक र वन विधेयक लगायतका विकास निर्माणमा बाधक रहेका कानून तथा नियमावलीहरूको अध्ययन गरी संशोधनका लागि सरकार र संसदीय समितिहरूसँग समन्वय गर्नेछ । अध्यक्ष डाँगीले वैदेशिक सहयोगमा बन्ने कतिपय विधेयकहरूले निजी क्षेत्रलाई संकुचित पार्न सक्ने भन्दै इप्पान आफैँले पनि विधेयकको मस्यौदा तयार पारी सरकारलाई बुझाउने र दबाब सिर्जना गर्ने योजना रहेको बताए ।
ऊर्जा क्षेत्रप्रति समाज र सरकारी संयन्त्रमा रहेको नकारात्मक दृष्टिकोण परिवर्तन गर्न ऊर्जा उद्यमीहरूको आचारसंहिता तयार गरिने भएको छ । झन्डै ७० लाख जनताको लगानी रहेको यस क्षेत्रलाई मर्यादित बनाउन विज्ञहरूको सल्लाहमा आचारसंहिता निर्माण गरी साधारण सभाबाट स्वीकृत गराइने अध्यक्ष डाँगीले जानकारी दिए। निजी क्षेत्रलाई ऊर्जा उत्पादनमा मात्र सिमित नराखी प्रशारण, वितरण र व्यापारमा समेत सहभागी गराउन विशेष ‘दृष्टिकोण पत्र’ तयार पारिने उनले बताए ।
इप्पानलाई पूर्ण रूपमा डिजिटल बनाउने लक्ष्यसहित प्रत्येक सदस्यलाई युजरनेम र पासवर्डमार्फत तथ्याङ्क हेर्न सक्ने व्यवस्था मिलाइने भएको छ । आगामी अधिवेशनदेखि अनलाइन मतदान प्रक्रिया शुरु गरिने प्रतिबद्धता समेत अध्यक्ष डाँगीले दोहो¥याए । यस्तै सचिवालयलाई व्यवस्थित बनाउन आफ्नै भवन निर्माण गर्ने र त्यसका लागि जग्गा वा रकम सहयोग गर्ने दाताहरूको नाममा भवन र हलहरूको नामकरण गरिने योजना अघि सारिएको छ ।
नेपालको ऊर्जा क्षेत्रको ब्राण्डिङ गर्न विदेश समन्वय उप–समिति गठन गरी अवैतनिक दूतहरूसँग समन्वय गरिने र अन्तर्राष्ट्रिय स्तरका सम्मेलनहरू आयोजना गरिने भएको छ । जलविद्युतका साथै सौर्य ऊर्जा, ग्रिन हाइड्रोजन, ब्याट्री स्टोरेज र बायोग्यासलाई प्रोत्साहन गर्ने नीति इप्पानले लिनेछ । छिमेकी मुलुक भारत, चीन र बंगलादेशका लगानीकर्ताहरूसँग अनुभव साटासाट गर्न नियमित कार्यक्रमहरू सञ्चालन गरिने अध्यक्ष डाँगीले उल्लेख गरे ।
अध्यक्ष डाँगीले निर्वाचनका दौरान देखिएका वैचारिक भिन्नताहरूलाई अन्त्य गर्दै इप्पान अहिले पूर्ण रूपमा एकतावद्ध भएको स्पष्ट पारे ।
