अकल्पनीय विपद्‌को सामना गरिरहेको देशलाई सम्बोधन गर्दै प्रधानमन्त्री वालेन्द्र शाह (बालेन)ले सरकार यथाशीघ्र र यथाशक्य उद्धार तथा राहत कार्यमा जुटिरहेको जानकारी दिएका छन्।

बिहीबार सामाजिक सञ्जालमार्फत एक सन्देश जारी गर्दै उनले सिङ्गो देश, विश्वभरका नेपाली तथा अन्तर्राष्ट्रिय समुदायको सहयोग र सहकार्यमा यो सङ्कटको सामना भइरहेको बताए।

प्रधानमन्त्री शाहका अनुसार आज बिहानै ६:३० बजेदेखि हवाई उद्धार कार्य सञ्चालन भइरहेको छ। बिहानदेखि १५ भन्दा बढी उडानहरू भइसकेका छन् भने थप हेलिकोप्टरहरू उडानका लागि तयारी अवस्थामा राखिएका छन्।

मुख्य उद्धार तथा राहतका अद्यावधिक जानकारी:

• टिमुरेबाट ११६ जनाको उद्धार: नेपाली सेनाको रेस्क्यु अपरेशनमार्फत रसुवाको टिमुरेबाट ९५ जना नेपाली र २१ जना भारतीय नागरिक गरी ११६ जनाको सकुशल उद्धार गरिएको छ। साथै सुरुङ (टनेल)मा थुनिएका ७ जना नेपाली नागरिकलाई पनि सफलतापूर्वक उद्धार गरिएको छ।

• अत्यावश्यक सामग्री ढुवानी: प्रभावित क्षेत्रहरूमा राहत सामग्रीका साथै जेनेरेटर, पोर्टेबल मोबाइल टावर, मेडिकल सामग्री, टेन्ट तथा फलाम-ढुङ्गा काट्ने मेसिनहरू द्रुत रूपमा पुर्‍याइँदैछ।

• सञ्चार र राहत शिविर: प्रभावित क्षेत्रमा अस्थायी रूपमा मोबाइल नेटवर्क र मोबाइल चार्जिङको व्यवस्था मिलाइँदैछ। यसैगरी नुवाकोटमा खाना तथा पानीको प्रबन्धसहितको अस्थायी शिविर तयार पारिसकिएको छ।

• ड्रोन सर्वे: उद्धार तथा राहतलाई थप चुस्त र प्रभावकारी बनाउन ड्रोनमार्फत सूचना सङ्कलनको काम अन्तिम चरणमा पुगेको छ।

• उद्धारमा प्राथमिकता: हवाई उद्धारका क्रममा सिकिस्त बिरामी, वृद्धवृद्धा, महिला र बालबालिकाहरूलाई पहिलो प्राथमिकता दिइनेछ।

प्रधानमन्त्री शाहले राज्यका सम्पूर्ण संयन्त्रहरू परिचालित भएकाले सबै नागरिकलाई धैर्य र संयम भई उद्धार तथा राहतको प्रतीक्षा गर्न अनुरोध गरेका छन्। उनले एक भएर यो विपत्तिको डटेर सामना गर्न अपिल गर्दै उद्धार कार्यमा हातेमालो गर्ने सबैप्रति आभार व्यक्त गरेका छन्।