नेप्सेले यस कम्पनीको पहिलो कारोबारका लागि प्रति कित्ता १०० रुपैयाँदेखि ३०० रुपैयाँसम्मको ओपनिङ रेन्ज तोकेको थियो। तर, बिहीबार बिहानको स्पेसल प्रि-ओपन सेसनमा तोकिएको न्यूनतम सीमाभन्दा ७० प्रतिशत न्यून मूल्य अर्थात् ३० रुपैयाँमा १० कित्ता शेयर कारोबार भएको देखिएको छ।
यस विषयमा नेप्सेका प्रवक्ता मुराहरि पराजुलीले यो एक प्राविधिक गडबडी भएको पुष्टि गरेका छन्। 'यो प्रणालीमा देखिएको प्राविधिक समस्या हो। जसलाई सच्याउन नेप्सेको प्राविधिक जनशक्तिले काम गरिरहेको छ,' पराजुलीले भने, 'जम्मा १० कित्ता शेयर ओपनिङ रेन्जभन्दा तल कारोबार भएको देखिएको छ। यसलाई केही क्षणमै सुधार गरी नियमित कारोबार सुचारु गरिनेछ।'
चैत ११ गते बुधवार नेप्सेमा सूचीकृत भएको यस कम्पनीको कुल १ करोड १८ लाख ५० हजार कित्ता शेयर दोस्रो बजारमा आएको हो। जसमा सर्वसाधारणका लागि वितरण गरिएको २६ लाख ७ हजार कित्ता र संस्थापक शेयरधनीहरूको ९२ लाख ९३ हजार कित्ता शेयर समावेश छ।
नेप्सेले कम्पनीलाई 'RLEL' स्टक टिकर प्रदान गरेको छ। प्राविधिक समस्याका कारण लगानीकर्ताहरूमा अन्योल सिर्जना भए पनि नेप्सेले यसलाई तत्काल सच्याउने तयारी गरेको छ। सुधारपछि कम्पनीको वास्तविक ओपनिङ रेन्जभित्रै रहेर नियमित सत्रमा कारोबार हुने अपेक्षा गरिएको छ।
