साताको पहिलो कारोबार दिन नेप्से परिसूचक घटेर बन्द भएको छ। यस दिनको गिरावटसँगै नेप्से परिसूचक २९०० विन्दुभन्दा तल झरेको छ। नेप्से परिसूचक ८ कारोबार दिनपछि २९०० विन्दुभन्दा तल झरेको हो।

आइतबार नेप्से परिसूचक ६३.७३ अंक घटेर २८५८.९० विन्दुमा झरेको छ। त्यस्तै, यस दिन सेन्सेटिभ इण्डेक्स १०.३७ अंक घटेको छ भने फ्लोट इण्डेक्स ४.२२ अंक र सेन्सेटिभ फ्लोट इण्डेक्स ३.५२ अंक घटेको छ।

नेप्सेसँगै यस दिन कारोबार रकम पनि घटेको छ। अघिल्लो कारोबार दिन अर्थात गत बिहीबार १५ अर्ब ९८ करोडको शेयर खरिदबिक्री भएको बजारमा यस दिन ३१९ स्टकको १ लाख ५२ हजार ५१८ पटकको कारोबारमा १३ अर्ब ७ करोड ५० लाख ४ हजार रुपैयाँबराबरको ३ करोड २२ लाख ६० हजार कित्ता शेयर खरिदबिक्री भएको छ।

यस दिन दुई स्टकको शेयर सकारात्मक सर्किट लेभलमा कारोबार भएको छ। यस दिन ट्रेड टावर र शिव श्री हाइड्रोपावरको शेयर सकारात्मक सर्किट लेभलमा कारोबार भएको हो। त्यस्तै, यस दिन थ्रि स्टार हाइड्रोपावरको शेयरमूल्य साढे ४ प्रतिशत बढेको छ। अन्य स्टकहरुको मूल्य वृद्धिदर भने ४ प्रतिशतभन्दा कम रहेको छ। यस दिन सान्भि इनर्जीकाे शेयर नकारात्मक सर्किट लेभलमा कारोबार भएको छ।

कारोबार रकमका आधारमा यस दिन नेपाल पुनर्बीमा कम्पनी शीर्ष स्थानमा रहेको छ। यस दिन सो कम्पनीको ७५ करोड ३९ लाख रुपैयाँबराबरको शेयर किनबेच भएको छ। त्यस्तै, यस दिन हिमालयन रि इन्स्योरेन्सको साढे ७१ करोड रुपैयाँबराबरको शेयर खरिदबिक्री भएको छ भने हिमालयन डिष्टिलरीको करिब ५९ करोडको शेयर कारोबार भएको छ।

यस दिन १३ वटै उपसमूहको परिसूचक घटेको छ। जसमध्ये अन्य उपसमूहको परिसूचक सर्वाधिक ३.४८ प्रतिशत घटेको छ। त्यस्तै, यस दिन लघुवित्त उपसमूहकाे परिसूचक ३ प्रतिशतभन्दा बढी घटेकाे छ भने  बैंकिङ्ग, लगानी, जीवन बीमा र उत्पादन तथा प्रशोधन उपसमूहको परिसूचक २ प्रतिशतभन्दा बढी घटेको छ।