आफ्नो पार्टीको तर्फबाट उम्मेदवार बनिदिन भन्दै तारन्तार दबाब दिएपछि कुलमान भने असमन्जस्यमा परेका छन् ।
केही समय पहिले मध्यपूर्वका विभिन्न देशहरुमा रहेका नेपालीहरुसँग भेटघाट गरेका कुलमान त्यहाँबाट फर्किएर अमेरिका पुगेका छन् । करिब २ सातामा अमेरिकामा रहेका नेपालीहरुसँग छलफल गरेपछि उनी इंग्ल्याण्ड, स्कटल्याण्ड, पोर्चुगललगायतका युरोपेली देश जाने भएका छन् । त्यसपछि बल्ल उनी नेपाल फर्किनेछन् ।
उनी विदेशमा रहेका नेपालीहरुसँग आफूले पार्टी खोल्न उपयुक्त हुन्छ कि हुँदैन र पार्टी खोलेमा तपाईले के सहयोग गर्नुहुन्छ भन्दै सुझाव माग्ने गरेका छन् । धेरैले उनलाई अरु पार्टीमा नलागी आफै पार्टी खोल्न सुझाव दिने गरेका छन् ।
कुलमान निकट स्रोतका अनुसार विदेशिएका नेपालीले उनलाई ‘उज्यालो नेपाल’ नामबाट पार्टी खोल्न सुझाव दिएका छन् । र, कुलमानले पनि त्यसलाई सकारात्मक रुपमा लिएका छन् । अर्थात् कुलमानले पार्टी खोलेमा त्यही नाम राखिने लगभग निश्चित छ ।
कुलमानले त्यही सन्दर्भमा डा. सन्दुक रुइत, महावीर पुन, बालेन, हर्क साम्पाङदेखि डा. मुकुल ढकाललगायतका व्यक्तिहरुसँग पटक पटक छलफल गरेका छन् । रुइत र पुनले आफूहरु पार्टीमा नलाग्ने तर आवश्यक परे आन्तरिक रुपमा सहयोग गर्न तयार रहेको आश्वासन दिएका छन् । आफै पार्टी खोल्ने प्रयासमा लागेका बालेन र हर्कले भने आफ्नै नेतृत्वमा आउन कुलमानलाई प्रस्ताव गरेको बताइएको छ ।
यता, आफै पार्टी खोल्ने सोँचमा पुगेका कुलमानलाई रुपन्देही ३ आगामी कात्तिकमा हुने उप निर्वाचनमा आफ्नो पार्टीको तर्फबाट उम्मेदवार भइ दिन माओवादी केन्द्र, नागरिक उन्मुक्ति पार्टी र राष्ट्रिय स्वतन्त्र पार्टीले पटक पटक प्रस्ताव गरिसकेका छन् । तर, कुलमानले भने कसैलाई पनि निधो दिएका छैनन् ।
‘ती पार्टीहरुमा जाँदा आफ्नो हैसियत के हुन्छ ? वा नयाँ पार्टी गठन गर्दा चलाउन कत्तिको सहज हुन्छ भन्ने बारेमा अहिले उहाँले गम्भिर रुपले आत्म चिन्तन गरिरहनु भएको छ । विदेशमा रहेका नेपालीहरुसँगको अन्तरकृयाहरुमा पनि उहाँले तिनै विषयमा सुझाव माग्नु भएको छ । रुपन्देहीको उपनिर्वाचनको लागि मनोनय दर्ता गर्ने दिनभन्दा केही दिन अगाडि नै उहाँले आफ्नो कुरा स्पष्ट पार्नुहुनेछ,’ कुलमानका एक निकट सहयोगीले मेरो लगानीसँग भने ।
कार्तिक १७ गते हुने उपनिर्वाचनको लागि असोज २१ गते उम्मेदवारी दर्ता गरिने निर्वाचन आयोगको कार्यक्रम छ ।
