प्राधिकरणको केन्द्रीय कार्यालय, कुपण्डोलमा आयोजना गरिएको उक्त कार्यक्रममा जोखिममा आधारित पूँजी सम्बन्धी मार्गचित्र सहित यसको कार्यान्वयन अवस्था, समयसीमा, प्रभावकारिता, अन्तर्राष्ट्रिय अभ्यास र बीमालेखको विकासका चरण तथा स्वीकृति प्रक्रिया लगायतका विषयमा बीमाङ्की विज्ञानका विद्यार्थीहरूलाई विस्तृत जानकारी दिइयो।
कार्यक्रमलाई सम्बोधन गर्दै नेपाल बीमा प्राधिकरणका कार्यकारी निर्देशक सुशील देव सुवेदीले बीमाङ्की विज्ञानको अध्ययन एवम् अनुसन्धानमा प्राधिकरणले त्रिभुवन विश्वविद्यालयसँग सहकार्य गर्दै आएको उल्लेख गरे। उनले बीमाङ्की विज्ञानको अध्ययनको गुणस्तर अभिवृद्धिका लागि नीतिगत व्यवस्था र स्रोत परिचालनमा समेत समन्वय गर्न प्राधिकरण तयार रहेको बताए। कार्यकारी निर्देशक सुवेदीले स्वदेशमा बीमाङ्कीहरूको माग बढ्दै गएको र प्रत्येक बीमा कम्पनीले बीमाङ्की तथा बीमाङ्कीय विश्लेषक नियुक्त गर्नुपर्ने व्यवस्था समेत गरिएकाले विद्यार्थीहरूका लागि स्वदेशमैं रोजगारीको राम्रो अवसर रहेको जानकारी दिए।
त्यसैगरी, नेपाल बीमा प्राधिकरणका निर्देशक ध्रुव तिमिल्सिनाले बीमा क्षेत्रको विकास, स्थायित्व र व्यावसायिक सुदृढीकरणमा बीमाङ्की तथा बीमाङ्कीय विश्लेषकहरूको भूमिका महत्वपूर्ण रहने स्पष्ट पारे। कार्यक्रममा नेपाल बीमा प्राधिकरणका उपनिर्देशक निर्मला मल्लले जोखिममा आधारित पूँजी सम्बन्धी मार्गचित्र, कार्यान्वयनको समयसीमा, प्रभावकारिता तथा बीमाङ्कीको भूमिकाका बारेमा प्रस्तुतीकरण गरिन्। सहायक निर्देशक सुधा काफ्लेले भने बीमालेखको विकासका चरण तथा नियामकीय प्रक्रिया सम्बन्धी विषयमा प्रकाश पारिन्।
अन्तरक्रियाका क्रममा सहभागी विद्यार्थीहरूले बीमा क्षेत्रमा बीमाङ्कीको आवश्यकता, जोखिम व्यवस्थापनमा जोखिममा आधारित पूँजीको भूमिका र कार्यान्वयन अवस्था, बीमालेखको विकासमा बीमाङ्कीको योगदान र रोजगारीका अवसर लगायतका विषयमा जिज्ञासा राखेका थिए। उक्त कार्यक्रममा त्रिभुवन विश्वविद्यालय, स्कूल अफ म्याथमेटिकल साइन्सका निर्देशक नवराज पौडेल तथा कार्यक्रम संयोजक केशव राज फुलारा र विद्यार्थीहरूको उल्लेख्य सहभागिता रहेको थियो।
