रास्वपा सभापति रवि लामिछानेको पहलमा बोलाइएको सर्वदलीय बैठकमा विभिन्न राजनीतिक दलका शीर्ष तथा प्रमुख नेताहरूको सहभागिता रहेको थियो। बैठकमा सुनसरीको देवानगञ्ज लगायतका स्थानमा विकसित घटनाक्रम र उत्पन्न सुरक्षा चुनौतीबारे गहन छलफल भएको थियो।
बैठकपछि नेपाली कांग्रेसका नेता भीष्मराज आङ्देम्बेका अनुसार, समाजमा धार्मिक सहिष्णुता, सामाजिक सद्भाव र शान्ति-सुव्यवस्था कायम राख्नका लागि सबै दलहरूले एकमुख भएर संयुक्त अपिल (विज्ञप्ति) जारी गर्ने सहमति भएको छ। आवेग र उत्तेजनामा नआई धैर्यताका साथ समस्याको समाधान पहिल्याउन नेताहरूले नागरिकलाई आह्वान गरेका छन्।
सर्वदलीय बैठकमा सहभागी नेताहरूले यस्तो संवेदनशील र गम्भीर परिस्थिति उत्पन्न हुँदा पनि प्रधानमन्त्री तथा गृहमन्त्रीको उपस्थिति र सक्रियता नदेखिएको भन्दै चासो व्यक्त गरेका छन्। नेकपा एमालेका महासचिव शंकर पोखरेल लगायतका नेताहरूले भीड नियन्त्रण र शान्ति सुरक्षा कायम गर्न सरकार किन प्रभावकारी हुन सकेन भन्ने प्रश्न उठाउँदै सरकारलाई थप जिम्मेवार भएर कदम चाल्न आग्रह गरे।
बैठकले देशका अन्य भागहरूमा समेत कुनै पनि बहानामा सामाजिक र धार्मिक सद्भाव बिग्रिन नदिन स्थानीय तहमा पनि संवाद र पहल बढाउनुपर्नेमा जोड दिएको छ।
